Power Minister chuan Chite-a 33 Kv Sub-Station siam mek chu en in, chak zawka hnathawh anih theih dan tur Engineer te leh Contractor te a sawipui a. Kumin September thla ral hma a zawh hman tum turin a chah a ni. He sub-station siam mek hi NESIDS atanga hmuh niin transformer lian 10 MVA pahnih dah tur a ruahman a ni a. Siam zawh a nih hunah chuan tuna Zuangtui (lower) Sub Station, Indoor Sub-Station leh Mualpui Sub-Station in a chawm veng tam tak te a chhawk zangkhai thei dawn a ni. 

Minister F Rodingliana chuan Zuangtui-a MRT Division a tlawh nghal bawk a. Store thawmthat dan tur leh transformer chhia siamthatna tur workshed dinna tur hmunhma te a en a. He workshed hi tihpuitlin anih hunah chuan Mizoram hmun hrang hrang atanga transformer chhia te dahkhawm a, repair theihte phaia thawn ngai lova repair theih tura ruahman a ni a, hei hian nasa takin sum senso pawh a ti tlem thei dawn a ni. Minister hian department bungruate pawh endik nghalin electric bante chu a size mai piahlamah a rih zawng pawh endik tel thin turin a chah a ni.

Zuangtui Sub-Station atanga Bukpui (Serchhip) kaltlanga Chhim lama power pekna line tihchangtlun nana CT Transformer lian dah dan tur chu Minister hian a en nghal bawk a. Chhim lam power pekna ber Melriat SS line a chhiat chang pawha Zuangtui atangin Bukpui (Serchhip) kaltlanga Chhim lam(Khawiva Sub Station) power pek thin chu load shedding ngai lova duh ang thala power pek anih theih nan he CT transformer lian hi dah tura ruahmanna siam a ni.

Minister chuan heng hmalakna leh ruahmanna kal mekte hi khaihlak lova power supply kan neihtheihna tur a nih bakah thlasik lo thleng tur atana inpuahchahna a nih thu sawiin, hunpui laia power hmanzat a san avanga harsatna awm thinte pumpelh a nih theih nan heng ruahmanna siamte hi chak taka bawhzui turin Engineer-te a chah a ni.